មីង គីម បួយ កើតនៅឆ្នាំ១៩៥៦មានស្រុកកំណើតនៅ តាខ្មៅ ស្រុកកណ្តាលស្ទឹង ខេត្តកណ្តាល។ អ្នកមីងមានមុខរបរជាអ្នកលក់ខោអាវជជុះចាប់តាំងពីឆ្នាំ២០០៧រហូតមកដល់សព្វថ្ងៃនេះ។ អ្នកមីងមានស្វាមីឈ្មោះ ជា ហាក់ នឹងមានកូនចំនួន៧នាក់ ស្រី៦នាក់ ប្រុស១នាក់។ ឪពុករបស់អ្នកមីងមានឈ្មោះ លឹម យៀនបានស្លាប់នៅក្នុងឆ្នាំ១៩៦០ ដោយសារជំងឺសួត និងម្តាយឈ្មោះ គីម ឡាយ បានស្លាប់នៅក្នុងរបបប៉ុលពតក្នុងឆ្នាំប្រហែលជា១៩៧៧។ អ្នកមីងមានបងប្អូនបង្កើតចំនួន២នាក់ ម្នាក់គឺជាអ្នកមីង លឹម គីមបួយ និងប្អូនប្រុសឈ្មោះ លឹម គីមសែ។ ម្តាយឪពុករបស់អ្នកមីងមានមុខរបរជាអ្នកលក់ចាប់ហួយនៅក្នុងផ្សារតាខ្មៅ មានស្រុកកំណើតនៅ តាខ្មៅ ស្រុកកណ្តាលស្ទឹង ខេត្តកណ្តាល។
ឪពុករបស់អ្នកមីងមានបងប្អូនបង្កើតចំនូន៤នាក់ ប្រុស២ ស្រី២ បងប្រុសទី១ឈ្មោះ លឹម ម្រេច ទី២ប្រុសឈ្មោះ លឹម យៀន ជាឪពុកបង្កើតរបស់អ្នកមីង (ទី៣ស្រី អ្នកមីងមិន ចាំឈ្មោះទេ) ទី៤ឈ្មោះ លឹម ពេជ្រ ឬ ហៅ (គូវ ពេជ្រ) ត្រូវជាមីងខាងឪពុករបស់អ្នកមីង ដែលអ្នកមីងកំពុងស្វែងរកសព្វថ្ងៃ ហើយពួកគាត់ទាំង៤នាក់ មានស្រុកកំណើតនៅ តាខ្មៅ ស្រុកកណ្តាលស្ទឹង ខេត្តកណ្តាល ទាំងអស់គ្នា។
នៅក្នុងឆ្នាំ១៩៦០ ឪពុករបស់អ្នកមីង គីម បួយ ធ្លាក់ខ្លួនឈឺរហូតដល់ស្លាប់ ដោយសារជំងឺសួត។ កាលពីលោកឪពុករបស់អ្នកមីង គីម បួយ ធ្លាក់ខ្លួនឈឺ ព្រោះតែម្តាយរបស់អ្នកមីងមិនបានទៅប្រាប់ញាតិសន្តានខាងឪពុករបស់អ្នកមីង គីម បួយ និងរហូតដល់ឪពុកអ្នកមីង គីម បួយ (ស្លាប់) ក៏ម្តាយរបស់អ្នកមីង មិនបានទៅប្រាប់ញាតិសន្តានខាងឪពុកទៀត ដូច្នេះហើយទើបញាតិសន្តានខាងឪពុកកាត់កាលចោល ឈប់រាប់អានគ្នាទាំងអ្នកមីង គីម បួយ និងម្តាយរបស់អ្នកមីងផងដែរ គឺឈប់រាប់អានគ្នាចាប់ពីក្នុងអំឡុងឆ្នាំ(១៩៦០) នៅពេលដែលឪពុករបស់អ្នកមីង គីម បួយ (ស្លាប់) រហូតមកដល់របបប៉ុលពតចូលកាន់កាប់ទីក្រុងភ្នំពេញ ក៏បានបែកគ្នារហូតមកដល់សព្វថ្ងៃនេះ។
ក្រោយមកនៅក្នុងឆ្នាំ១៩៩៥ - ១៩៩៦ ក្រោយរបបប៉ុលពតបានដួលរលំ បានឮដំណឹងថាឈ្មោះ លឹម ពេជ្រ ឬ ហៅ គូវ ពេជ្រ ជាអ្នកមកពីបរទេស បានដើរសួររកបងប្អូន(ឈ្មោះគូវ ពេជ្រ បានដើរសួរគេថាមានស្គាល់បង យៀន ឬទេ)។ អ្នកមីង គីម បួយ បានទទួលដំណឹងនេះមកពី ពូរបស់អ្នកមីងដែលមានឈ្មោះ សុខ សារិន។ លោក សុខ សារិន ត្រូវជាពូខាងម្តាយរបស់អ្នកមីង (ប៉ុន្តែអ្នកមីងមានប្រសាសន៍ថា អ្នកមីង និង ពូរបស់អ្នកមីងមិនសូវរាប់អានគ្នាជិតស្និតទេ)។ពូរបស់អ្នកមីងបាននិយាយប្រាប់អ្នកមីងថា (មានអ្នកលក់ល័ក្ខម្នាក់នៅផ្សារទួលទំពួងបាននិយាយប្រាប់ពូថាមានគេមកពីកាណាដាដើរសួររកបងប្អូន និង ឈ្មោះ បងយៀន កាលនោះពូជាអ្នកលក់មួកសំបុកបោះដុំ នៅផ្សារទួលទំពួង ក្រុងភ្នំពេញ)។ពូរបស់អ្នកមីង គីម បួយ សព្វថ្ងៃគាត់រស់នៅទីក្រុងភ្នំពេញ ហើយមានមុខរបរជាម្ចាស់ផ្ទះសំណាក់ (វ៉ាស៊ីនតោន) នៅម្ដុំជ្រោយចង្វា ក្រុងភ្នំពេញ។
ប្រសិនបើអ្នកមីង លឹម ពេជ្រ ដែលត្រូវជាមីងខាងឪពុករបស់អ្នកមីងលឹម គីមបួយ បានឭដំណឹងនេះឬលោកអ្នកដែលបានស្គាល់ឬក៏ប្រទះជួបអ្នកដែលមានភិនភាគដូចដែលបានរៀបរាប់ជូនខាងលើសូមទស្សនិកជនទំនាក់ទំនងមកកាន់កម្មវិធីយើងខ្ញុំតាមរយៈទូរស័ព្ទលេខ ០៩៧៥ ០៩៧ ០៩៧ ឬ មកទំនាក់ទំនងដោយផ្ទាល់នៅអគ្គនាយកដ្ឋានវិទ្យុ និង ទូរទស្សន៍បាយ័ន៕
