សព្វថ្ងៃលោក តឹក ទ្រី មានអាយុ៤៤ឆ្នាំ មានមុខរបរជាអ្នកលក់ការ៉េម។ លោក តឹក ទ្រី មានស្រុកកំណើតនៅទីក្រុងភ្នំពេញ។ លោកមានឪពុកឈ្មោះ ក្វា តឹក ជាជនជាតិចិន មានអាយុប្រហែលជា៩០ឆ្នាំ ម្ដាយឈ្មោះ តាំង សុហេង (ស្លាប់ជំនាន់ប៉ុលពត) និងមានបងប្អូនបង្កើតចំនួន៥នាក់។ កូនទី១ ឈ្មោះ តឹក ម៉េង ភេទប្រុស(ស្លាប់នៅជំនាន់ប៉ុលពត) ទី២ឈ្មោះ តឹក ទ្រី ភេទប្រុសជាអ្នកដែលស្វែងរក អាយុ៤៤ឆ្នាំ ទី៣ ឈ្មោះ តឹក អេង ភេទស្រី ជាអ្នកដែលបាត់ខ្លួន អាយុប្រហែលជា៤២ឆ្នាំ ទី៤ ឈ្មោះ តឹក ហ៊ុយ ភេទប្រុស ជាអ្នកដែលបាត់ខ្លួន មានអាយុប្រហែលជា៣៨ឆ្នាំ ទី៥ ប្អូនពៅ មិនចាំឈ្មោះ ប៉ុន្ដែបានស្លាប់នៅក្នុងជំនាន់ប៉ុលពត តាំងពីនៅជាទារកម្ល៉េះ។
មុនឆ្នាំ១៩៧៥ ក្រុមគ្រួសារលោក តឹក ទ្រី មានដើមកំណើតនៅទីក្រុងភ្នំពេញ បាននាំគ្នាទាំងគ្រួសារនៅប្រកបមុខរបរជាអ្នកព្យាបាលជម្ងឺនៅប៉ោយប៉ែត ស្រុកអូរជ្រៅ ខេត្តបន្ទាយមានជ័យ។ ម្ដាយជាអ្នកលក់ត្រី ក្នុងផ្សារប៉ោយប៉ែត។ ក្នុងឆ្នាំ១៩៧៥ ខ្មែរក្រហមបានជម្លៀសប្រជាជនចេញពីស្រុកអូរជ្រៅទាំងអស់គ្នាមករស់នៅស្រុកធូបនិមិត្តអស់រយៈពេលមួយខែពេលនោះប្អូនពៅរបស់លោក តឹក ទ្រី បានឈឺហើយក៏ស្លាប់នៅទីនោះ។ ក្រោយមកក៏ត្រូវជម្លៀសចេញដោយជិះរទេះភ្លើងទៅស្ថានីយសូភី ទៅចុះនៅថ្មគោល ខេត្តបាត់ដំបង ហើយក៏បញ្ជូនប្រជាជនឲ្យទៅនៅលើភូមិទួលទំពូង ស្រុកមិនចាំ ខេត្តបាត់ដំបង។ នៅទីនោះប្រជាជនបានស្លាប់ច្រើនណាស់ ដោយសារការអត់បាយ ពេលនោះម្ដាយលោក តឹក ទ្រី ក៏បានស្លាប់នៅទីនោះដែរ។ ចុងឆ្នាំ១៩៧៦ ក្រុមគ្រួសារលោក តឹក ទ្រី ត្រូវប៉ុលពតជម្លៀសជាមួយប្រជាជនផ្សេងទៀតចេញពីទីទួលទំពូងនោះ ឲ្យទៅនៅឃុំបវិល ភូមិក្ដុលតាហែន ក្នុងសហករណ៍កងលេខ២ស្វាយជ្រំ(សព្វថ្ងៃស្វាយជ្រំបានដូរឈ្មោះជាភូមិបួរខេត្តបាត់ដំបងវិញ)។
ប្រហែលជា៣ទៅ៤ខែ បងប្រុសឈ្មោះ តឹក ម៉េង ក៏មានជម្ងឺហើយស្លាប់នៅក្នុងភូមិនោះទៅ។ ក្រោយមក លោក តឹក ទ្រី ត្រូវគេហៅចូលកងចល័តកុមារម្នាក់ឯង ចំណែកឪពុកលោក ឈ្មោះ ក្វា តឹក និងប្អូនស្រី ប្អូនប្រុស មកនៅក្នុងសហករណ៍ភូមិក្ដុលតាហែន ខេត្តបាត់ដំបងដដែល រហូតមកដល់កងទ័ពវៀតណាមចូលរំដោះឆ្នាំ១៩៧៩ លោក តឹក ទ្រី ត្រូវបែកបាក់ឪពុក និងប្អូនប្រុស ប្អូនស្រី ដោយសារពេលនោះមានភាពច្របូកច្របល់ លោក តឹក ទ្រី ក៏រត់តាមអ្នកភូមិមកនៅចុងអាងសង្កែវា ឃុំបវិល ខេត្តបាត់ដំបង។ ចំណែកឪពុក និងបងប្អូនទៅនៅក្នុងភូមិកំពង់ភ្នៅ ឃុំបវិល ជិតគ្នាដែរ។ លោក តឹក ទ្រី ទៅមករកឪពុកនិងប្អូនៗជាធម្មតា។ ប្រហែលជា៣ទៅ៤ខែក្រោយមក គាត់ទៅរកឪពុកគាត់មិនបានជួបទេ តែលោកឪពុក ក្វា តឹក បានផ្ដាំនឹងអ្នកស្រុកជិតខាងថាគាត់ទៅនៅថ្មគោល ខេត្តបាត់ដំបង ជាង១០ថ្ងៃហើយ។ ចាប់ពីពេលនោះមក លោក តឹក ទ្រី លែងបានជួបឪពុក ប្អូនប្រុស និងប្អូនស្រីរហូតមកដល់សព្វថ្ងៃនេះ។
ឆ្នាំ១៩៨៦-៨៧ លោក តឹក ទ្រី បានទទួលដំណឹងពីពូម្នាក់ឈ្មោះ ឈឺត បច្ចុប្បន្នធ្វើពេទ្យស្រុក(មិនចាំឈ្មោះស្រុក)ខេត្តបាត់ដំបងថាគាត់បានជួបនឹងពូ ក្វា តឹក និងប្អូនស្រី-ប្អូនប្រុស លក់គុយទាវនៅជំរុំចាស់ នៅក្នុងទឹកដីថៃ។ ពេលដែលដឹងដំណឹងនេះភ្លាម គាត់ចង់ធ្វើដំណើរទៅរកឪពុកដែរ តែមិនហ៊ានទៅដោយខ្លាចជាន់មីនស្លាប់។ ឆ្នាំ១៩៩៣-៩៤ លោក តឹក ទ្រី បានមករស់នៅ ខេត្តពោធិ៍សាត់ ហើយក៏មានគ្រួសារនៅទីនោះរហូតដល់សព្វថ្ងៃ។ លោក តឹក ទ្រី កំពុងស្វែងរកទី១គឺឪពុកបង្កើតឈ្មោះ ក្វា តឹក ជនជាតិចិនគាត់ជាអ្នកលក់ថ្នាំចិនសែនៅជំនាន់លន់នុល អាយុប្រហែល៦០ឆ្នាំ ទី២ គឺប្អូនស្រី ឈ្មោះ តឹក អេង មានអាយុប្រហែល៤២ឆ្នាំ ទី៣គឺប្អូនប្រុស ឈ្មោះ តឹក ហ៊ុយ មានអាយុប្រហែល៣៨ឆ្នាំ។
ប្រសិនបើឈ្មោះ ក្វា តឹង ដែលត្រូវជាឪពុកបង្កើត និងប្អូនប្រុសស្រី របស់លោក តឹក ទ្រី ឭដំណឹងនេះឬលោកអ្នកដែលបានស្គាល់ឬក៏ប្រទះជួបអ្នកដែលមានភិនភាគដូចដែលបានរៀបរាប់ជូនខាងលើសូមទស្សនិកជនទំនាក់ទំនងមកកាន់កម្មវិធីយើងខ្ញុំតាមរយៈទូរសព្ទ័លេខ ០៩៧៥ ០៩៧ ០៩៧ ឬ មកទំនាក់ទំនងដោយផ្ទាល់នៅ អគ្គនាយកដ្ឋានវិទ្យុ និង ទូរទស្សន៍បាយ័ន៕
