លោក ចិន បូរ៉ា ហៅ សិត សុវណ្ណារ៉ា មានអាយុ ៤២ឆ្នាំ សព្វថ្ងៃធ្វើការនៅមន្ទីរពេទ្យសត្វ។ លោក សិត សុវណ្ណារ៉ា មានបងប្អូនបង្កើត ៣នាក់ ទី១ ឈ្មោះ ចិន បូរ៉ា ហៅ សិត សុវណ្ណារ៉ា ឬ តូ,ទី២ ឈ្មោះ សិត ធី ហៅ ទី មានអាយុ៤០ឆ្នាំ និង ទី៣ភេទប្រុសមិនចាំឈ្មោះ។ សព្វថ្ងៃនេះលោក សិតសុវណ្ណារ៉ា កំពុងស្វែងរកឪពុកម្តាយបង្កើត។ ឆ្នាំ១៩៧៥ ឪពុកម្តាយ និងកូន៣នាក់ ត្រូវបានផ្លាស់ចេញពីភ្នំពេញទៅធ្វើជាគ្រូបង្រៀន នៅទីរួមខេត្តកំពង់ឆ្នាំង។ ថ្ងៃមួយលោកចិន បូរ៉ា បានរត់លេងដួលមុតដៃនឹងអំបែងកែវយ៉ាងធ្ងន់ ម្តាយលោកបានព្យាបាលរបួសកូនដោយខ្លួនឯងមួយរយៈ ហើយក៏បញ្ជូនឈ្មោះចិន បូរ៉ា មានអាយុ៨ឆ្នាំ និងឈ្មោះសិទ្ធ ធី មានអាយុ៦ឆ្នាំ មកនៅជាមួយនឹងលោកយាយមួន និង អ៊ុំ នៅឯផ្ទះទួលគោកវិញ។
មុននឹងចាកចេញពីកូនត្រឡប់មកខេត្តកំពង់ឆ្នាំងវិញ គាត់បានផ្តាំកូនប្រុសទាំង២ថា មុនចូលឆ្នាំខ្មែរ១ថ្ងៃ ម្តាយនឹងត្រឡប់មកយកកូនទៅរស់នៅជាមួយម្តាយវិញ។ លុះដល់ថ្ងៃចូលឆ្នាំខែ្មរមកដល់ឆ្នាំ១៩៧៥ ពួកគាត់មិនឃើញអ្នកម្តាយត្រឡប់មកយកកូនទេ។ កូនទាំងពីររង់ចាំមើលផ្លូវម្តាយត្រឡប់មកវិញរាល់ថ្ងៃ រហូតដល់ថ្ងៃ១៧ មេសា ១៩៧៥ កងទ័ពប៉ុលពត បានចូលមកដល់ទីក្រុងភ្នំពេញ ហើយបានជម្លាសប្រជាជនចេញពីទីក្រុងទាំងអស់។ ពេលនោះលោកចិន បូរ៉ា កំពុងព្យាបាលដៃក្នុងមន្ទីរពេទ្យចិនជាមួយនឹងលោកយាយ មួន និងប្អូនប្រុសហើយក៏ត្រូវបានទាហានប៉ុលពតជម្លាសចេញពីមន្ទីពេទ្យមកដល់ ឃុំព្រែកឯង ស្រុកគៀនស្វាយ ខេត្តកណ្តាល ហើយក៏រស់នៅទីនោះរហូតក្នុងសហករព្រែកឯងតែ២នាក់បងប្អូន។ ចំណែកលោកយាយមួនក៏បានស្លាប់ទៅក្រោយពីធ្វើដំណើរតាមផ្លូវអស់រយៈពេល៣ថ្ងៃ។
ឆ្នាំ១៩៧៩ ពេលដែលប្រទេសកម្ពុជា ត្រូវបានទាហានវៀតណាមចូលមករំដោះ លោក ចិន បូរ៉ា ហៅ សិត សុវណ្ណារ៉ា ឬ តូ និងប្អូនប្រុសឈ្មោះ សិត ធី ហៅ ទី បានឈររង់ចាំមើលគេនៅតាមផ្លូវជាតិព្រែកឯង បានជួបនឹងម្តាយធម៌២នាក់។ម្តាយធម៌ទី១ឈ្មោះ គង់ មុត បច្ចុប្បន្នមានអាយុ ៦៩ឆ្នាំ សុំកូនបងឈ្មោះ សិត សុវណ្ណារ៉ា ទៅនៅជាមួយ នៅភូមិព្រះបាក់ក ឃុំព្រៃធំ ស្រុកកំពង់រោទិ៍ ខេត្តស្វាយរៀង និង ម្តាយធម៌ទី២ឈ្មោះ គង់ វ៉ាត មានអាយុ ៦៧ឆ្នាំ បានសុំកូនប្អូនឈ្មោះ សិត ធី ហៅ ទី ធ្វើជាកូនធម៌ ហើយរស់នៅភូមិព្រៃធំ ឃុំព្រៃធំ ស្រុកកំពង់រោទិ៍ ខេត្តស្វាយរៀង រហូតដល់សព្វថ្ងៃ។
លោក ចិន បូរ៉ា ហៅ សិត សុវណ្ណារ៉ា មានឪពុកបង្កើតឈ្មោះ សិត ថា ធ្វើគ្រូបង្រៀននៅ វិទ្យាល័យទួលគោក មានទីកន្លែងកំណើតនៅទួលគោក ភ្នំពេញ និងមានភិនភាគសម្គាល់រាងស្តើង កំពស់ខ្ពស់ សម្បុរស្រអែម និងនិយាយមួយៗ។ម្តាយបង្កើតឈ្មោះ ឡា ដា មុខរបរជាអ្នកលក់ស្ករស។ ភិនភាគសម្គាល់គឺជាកូនកាត់ចិនមានប្រជ្រុយដុះនៅខាងលើមាត់មិនដឹងឆ្វេង ឬស្តាំ កំពស់ ១,៦៥ម ធាត់ល្មម។
ប្រសិនបើលោក អន សុងដែលត្រូវជាកូនប្រុសបង្កើតរបស់លោក អន សុស បានឭដំណឹងនេះឬលោកអ្នកដែលបានស្គាល់ឬក៏ប្រទះជួបអ្នកដែលមានភិនភាគដូចដែលបានរៀបរាប់ជូនខាងលើសូមទស្សនិកជនទំនាក់ទំនងមកកាន់កម្មវិធីយើងខ្ញុំតាមរយៈទូរស័ព្ទលេខ ០៩៧៥ ០៩៧ ០៩៧ ឬ មកទំនាក់ទំនងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន៕
