សព្វថ្ងៃ លោក ម៉េង លាន មានអាយុ ៥៧ឆ្នាំ មានស្រុកកំណើតនៅ ភូមិដំណាក់ត្រាច ឃុំចង្រីទីង ស្រុកកំពត ខេត្តកំពត។ លោកអ៊ុំ ម៉េង លាន មានប្រពន្ធឈ្មោះ ទន់ ហ៊ូន ពួកគាត់មានមុខរបរធ្វើស្រែ និងដាំបន្លែ។ លោកអ៊ុំ ម៉េង លាន កំពុងស្វែងរកអ្នកមីង ជឹម គុន ត្រូវជាប្អូនស្រីជីដូនមួយរបស់លោកអ៊ុំ។ លោកស្រី ជឹម គុន ត្រូវជាកូនបង្កើតរបស់លោកតា ជឹម យើង និងលោកយាយ គី។ លោកអ៊ុំ ម៉េង លាន បានយកលោកស្រី ជឹម គុន មកចិញ្ចឹមនៅពេលដែលឪពុកម្តាយរបស់អ្នកមីងបានស្លាប់។ នៅពេលដែលទាហានរំដោះវៀតណាមចូលក៏នាំគ្នារត់រហូតដល់ព្រំដែនថៃ ខេត្តពោធិ៍សាត់ ហើយក៏បែកគ្នាចាប់តាំងពីពេលនោះមក។
លោកស្រី ជឹម គុន មានបងប្អូនបង្កើត២នាក់។ បងស្រីគឺជាអ្នកមីង ជឹម គុន និង ប្អូនប្រុសមានឈ្មោះ ជឹម កឿន។ សព្វថ្ងៃអ្នកមីង ជឹម គុន លឺដំណឹងថារស់នៅប្រទេសក្រៅ ម្យ៉ាងទៀតអ្នកមីងធ្លាប់មករកបងប្អូនចំនួន២លើកមកហើយ កាលពី ខែ៣ ឆ្នាំ២០១០ គាត់បានមករកបងប្អូនដែលរស់នៅខេត្តកំពតម្ដងទៀត ប៉ុន្តែមិនជួបព្រោះប្រជ្រួសគ្នា។ នេះជាលើកទី៣ហើយដែលគាត់បានមកស្វែងរកបងប្អូន។ សំរាប់ការមករកលើកទី៣នេះគាត់បានមកដល់ខេត្តកំពតទៀត ហើយបានជួបនឹងអ៊ុំស្រីម្នាក់ឈ្មោះ ឡាន មានមុខរបរជាអ្នកលក់កាហ្វេនៅក្នុងភូមិ ហើយបានរៀបរាប់ប្រាប់អ៊ុំលក់កាហ្វេថា កាលគាត់មកនេះគាត់មករកបងប្អូន តែនៅពេលគាត់សួររកគឺឈ្មោះ លាន នៅភូមិដំណាក់ត្រាច ប៉ុន្តែអ៊ុំលក់កាហ្វេថាគាត់អត់ស្គាល់ទេ ឈ្មោះ លាន នៅភូមិដំណាក់ត្រាច។ បន្ទាប់មកអ្នកមីង ជឹម គុន គាត់បានអង្គុយលេងនៅតូបកាហ្វេចាប់តាំងពីព្រឹករហូតដល់ថ្ងៃត្រង់ទើបត្រឡប់ទៅវិញ ហើយគាត់បានប្រាប់អ៊ុំលក់កាហ្វេថាគាត់ស្នាក់នៅម្តុំទួលទំពួង ប៉ុន្តែគាត់មិនប្រាប់ថាផ្ទះលេខប៉ុន្មាន និង ផ្លូវណាឡើយ។
មិនបានប៉ុន្មានថ្ងៃ លោកអ៊ុំឈ្មោះ លាន បានមកហូបកាហ្វេនៅតូបអ៊ុំស្រី ឡាន តាមការពិតទៅអ៊ុំស្រី ឡាន ស្គាល់អ៊ុំប្រុស លាន ច្បាស់ណាស់ ប៉ុន្តែគឺគាត់តាលាននៅ ភូមិភ្នំតូច គាត់មិនស្គាល់ទេ តាលាន នៅ ភូមិដំណាក់ត្រាច។ ក្រោយមកអ៊ុំ ឡាន ក៏បានរៀបរាប់ពីភិនភាគអ្នកមករកអ៊ុំប្រុស លាន ថាឈ្មោះ គុន ហើយពួកគាត់ក៏បានអង្គុយសន្ទនាគ្នា រហូតដល់អ៊ុំប្រុស លាន ដឹងថាអ្នកមីង គុន គឺជាប្អូនរបស់គាត់។
បច្ចុប្បន្នលោក ម៉េង លាន និងក្រុមគ្រួសាររបស់គាត់កំពុងមានការនឹករលឹកដល់អ្នកមីង ជឹម គុន ជាខ្លាំង ហើយនិង កំពុងខិតខំស្វែងរកប្អូនស្រីជីដូនមួយរបស់គាត់។
ប្រសិនបើលោកស្រី ជឹម គុន ដែលត្រូវជាប្អូនជីដូនមួយរបស់លោក ម៉េង លាន បានឭដំណឹងនេះឬលោកអ្នកដែលបានស្គាល់ឬក៏ប្រទះជួបអ្នកដែលមានភិនភាគដូចដែលបានរៀបរាប់ជូនខាងលើសូមទស្សនិកជនទំនាក់ទំនងមកកាន់កម្មវិធីយើងខ្ញុំតាមរយៈទូរសព្ទ័លេខ ០៩៧៥ ០៩៧ ០៩៧ ឬ មកទំនាក់ទំនងដោយផ្ទាល់នៅ អគ្គនាយកដ្ឋានវិទ្យុ និងទូរទស្សន៍បាយ័ន៕
